Kason farko na sojin Faransa sun isa Chadi daga Nijar

Rundunar sojin Faransa, ta ce kason farko na bataliyar sojojin dakarunta da ta fara janye su daga Jamhuriyar Nijar, a bisa umarnin sojojin da suka yi juyin mulki a kasar, sun isa Chadi, bayan da suka shafe tafiya mai nisan kilomita dubu sama da dubu 1 da 600 cikin kwanaki 9. 

Sojojin Faransa kenan da ke shirin ficewa daga Nijar. © THOMAS COEX / AFP

Yayin zanta wa da kamfanin dillancin labarai na AFP, mai magana da yawun rundunar sojin Faransa Pierre Gaudilliere ya ce bayan sararawa a Chadin, dakarun nasu za su tashi ne kai tsaye zuwa birnin Paris. 

A makon da ya gabata, sojojin Faransar suka fara ficewa daga Nijar, bayan da sojojin da suka yi wa shugaba Bazoum juyin mulki a watan Yuli suka ba su umarnin ficewa. 

Karo na uku kenan cikin watanni 18, da wata kasa da baya Faransar ta yi  wa mulkin mallaka ta kori sojojinta a nahiyar Afirka, lamarin da ya dakushe tasirinta a nahiyar. 

A baya dai dakarun Faransa kimanin dubu 1 da 400 aka rarraba a zuwa sassan Nijar, inda wasu ke birnin Yamai, wasu kuma ke yammacin kasar domin yaki da ‘yan ta’adda masu alaka da kungiyoyin IS da Al Qa’ida.