ECOWAS ta yi amfani da karfin Soji a kasashe 6 kafin Nijar - Alkaluma

Dai dai lokacin da hankula suka ta shi bayan matakin kungiyar ECOWAS na shirin amfani da karfin Soji wajen dawo da mulkin farar hula a jamhuriyyar Nijar, wasu alkaluma sun tattaro yadda kungiyar a baya ta yi amfani da karfin wajen dawo da demokradiyya a wasu kasashe har guda 6 na nahiyar Afrika.

Taron kungiyar ECOWAS a Abuja babban birnin Najeriya. AFP - KOLA SULAIMON

Tun shekaru 32 da suka gabata kungiyar ECOWAS ta fara amfani da karfin Soji wajen tabbatar da dawowar mulkin Demokradiyya a kasashe, inda a shekarar 1990 kungiyar mai mambobi 15 ta hada wata runduna ta musamman mai kunshe da dakaru kusan dubu 20 galibi sojin Najeriya wadanda suka yi yaki a Liberia da nufin kawo karshen yakin basasar da kasar ta fada, wanda zuwa shekarar 1997 suka yi nasarar mayar da kasar karkashin mulkin demokradiyya bayan gudanar da zabe.

A 1997 ECOWAS ta sake aikewa da dakaru Saliyo wadanda suka kawar da sojojin da suka yi juyin mulki tare da mayar da shugaba Ahmad Tejan Kabbah kan kujerarsa inda a shekarar 1999 suka sake fatattakar ‘yan tawayen kasar gabanin majalisar dinkin duniya ta ja ragamar aikin wanzar da zaman lafiya a kasar a shekarar 2000.

Cikin 1999 ECOWAS ta aike da dakaru Guinea Bissau bayan soji sun hambarar da gwamnatin Joao Bernado Vieira, yayinda ko a Ivory Coast cikin shekarar 2003 aka ga dakarun kungiyar dubu 1 da 300 don dakile yakin basasar kasar.

Haka zalika a 2013, ECOWAS ta aike da dakaru Mali don yaki da ‘yan tawaye gabanin kare aikin rundunar cikin watan Yunin da ya gabata.

Bugu da kari anga dakarun ECOWAS a Gambia cikin shekarar 2017 lokacin da Yahya Jammeh ya ki amincewa da sauka daga mulki don hawan zababben shugaba Adama Barrow.