Guguwar Eloise ta rushe gidaje fiye da dubu 5 a Mozambique

Hukumomin agaji a Mozambique sun ce dubban mutane sun rasa muhallansu sakamakon guguwar Eloise da ta ratsa kasar a karshen mako.

Hoton da asusun UNICEF ya dauka a ranar 24 ga Janairun 2021, dake nuna ambaliyar ruwan da guguwar Eloise ta haddasa a yankin Buzi dake kasar Mozambique Bruno Pedro / UNICEF / AFP

Rahotanni sun ce guguwar dake gudun kilomita 150 kowacce sa’a, dauke kuma da ruwan sama, ta afkawa birnin Beira dake gabar ruwa, abinda yayi sanadin raba mutane akalla dubu 7 da gidajensu, yayin da gidaje sama da dubu 5 suka rushe.

Hukumar again gaggawa tace mutane 6 sun mutu a hadarin, kana wasu 12 sun jikkata.

Shekaru biyu da suka gabata dai guguwar Idai ta tafka mummunar barna a garin na Beira dake gabar ruwa, inda ta salwantar da rayukan mutane da dama da kuma janyo hasarar dimbin dukiya.