Sabon shugaban kasar Burundi Evariste Ndashimiye zai sha rantsuwar fara aiki

Gwamnatin Burundi ta ce a ranar alhamis mai zuwa za’a rantsar da zababben shugaban kasa Evariste Ndashimiye kamar yadda kotun koli ta bada umurni domin maye gurbin shugaba Pierre Nkurinziza da ya mutu a makon jiya.

Zababben shugaban na Burundi Evariste Ndashimiye. Tchandrou NITANGA / AFP

Tuni ma’aikatar harkokin wajen kasar ta aike da takardun gayyata ga jakadu da jami’an diflomasiya domin halartar bikin shan rantsuwar da za’ayi a Gitega, babban birnin kasar.

Ndashimiye mai shekaru 52, tsohon Janar ne na sojin kasar kana kuma tsohon dan tawaye ne daga bangaren 'yan kabilar Hutu a rikicin kasar.

Yayin zaben kasar da ya gudana cikin watan jiya, Ndashimiye ya samu kusan kashi 69 na kuri’un da aka kada, abinda ya bashi nasara.

Tun a makon jiya ne dai kotun kundin tsarin mulkin kasar ta bukaci gaggauta rantsar da zababben shugaban biyo bayan mutuwar shugaba Pierre Nkurunziza.