An kama Tsohon Ministan Gambia a Switzerland

Jami’an Tsaro a kasar Switzerland sun kama tsohon ministan harkokin cikin gidan Gambia Ousman Sonko wanda ake zargi da laifufukan cin zarafin Bil Adama lokacin mulkin Yahya Jammeh.

Tsohon Ministan cikin gidan Gambia Ousman Sonko standard.gm

Mai gabatar da kara Cristof Scheurer ya ce ana binciken tsohon ministan a karkashin dokar kasar mai lamba 264.

Sonko ya dade yana shugabancin jami’an tsaron fadar shugaban kasa kafin a nada shi ministan cikin gida.

Yanzu haka tsohon jami’in na a tsare a hannun jami’an tsaro a birnin Bern na Switzerland.
A watan Satumba ne Jammeh ya tube Sonko daga mukamin minister kuma lokacin ne ya tsere zuwa Turai inda Sweden ta ki ba shi mafaka.

Rahotanni sun ce a watan Nuwamba ya nemi mafaka a Switzerland.

Wannan na zuwa a yayin da sabon shugaban Gambia Adama Barrow ya koma Banjul daga Senegal bayan ficewar Jammeh da ya mulki Gambia a tsawon shekaru 22.