Wakilan gwamnatin Burundi sun ki halartar zaman tattaunawa da yan Adawa.

Ana sauran kwanaki biyu a gudanar da rikitacen zaben shugabancin kasar Burundi, tattaunawar da ake yi da nufin kawo karshen rikicin da kasar ta tsinci kanta a ciki tun karshen watan avrilun da ya gabata, tsakanin yan adawa da gwamnatin kasar an sake dage ta a yau lahadi, sakamakon rashin halartar wakilan gwamnatin kasar a zauren tattaunawar

tattaunawar kasar Burundi: ministan tsaron kasar Uganda, Crispus Kiyonga, tare da sakatare janar din kungiyar kasashen gabashin Afrika , Richard Sezibera. RFI/Sonia Rolley

Kasar Uganda dake shiga tsakani wajen ganin an warware rikicin ta hanyar tattaunawa, ta ce, bangaren shugaban kasar , cewa wakilan gwamnati da na jami’iyar dake mulkin kasar ta Burundi, basu halarci zaman tattaunawar ta yau lahadi ba, da ake gudanarwa a hotel Bujumbura al’amarin da ya tilasta daga zaman tattaunawar na yau

Masharhanta dai na ganin da gangan ne wakilan gwamnatin suka kauracewa tattaunawar ta yau, domin a ganinsu wata kila basu da abin cewa, a mahawarar  neman daga ranar gudanar da zaben shugabancin kasar da shugaba Nkronziza, dake son yin tazarce  a wani wa’adi na uku a jere  kan karagar shugabancin kasar ke son gudanarwa a ranar talata mai zuwa, duk kuwa da kiraye kirayen da kasashen duniya ke yi masa na kaucewa yin haka domin gudun jefa kasar cikin rikicin siyasa marar iyaka.