Rooney na cikin tsaka mai wuya

Kaften din tawagar kwallon kafar kasar Ingila, Wayne Rooney ya bayyana cewa, yana cikin tsaka mai wuya bayan an dauki matakin ajiye shi a banci a karawar da kasarsa za ta yi da Slovenia a wasan neman gurbin shiga gasar cin kofin duniya a gobe Talata.

Dan wasan Ingila, Wayne Rooney Reuters/Gonzalo Fuentes

Kocin rikon kwaryar tawagar, Garerh Southgate ya bayyana cewa, matakin ajiye Rooney a banci na cikin tsari.

Rooney mai shekaru 30, bai samu nasarar zura kwallo a wasan da suka doke Malta da ci 2-0 a ranar Asabar ba, duk kuwa da cewa da shi aka fara wasan.

Sannan kuma ya sha ihu daga bagaren wasu magoya bayan Ingila a lokacin wannan wasa.

Kazalika, ita ma kungiyarsa ta Manchester United ba ta fara da shi a wasanni uku da ta buga a baya-bayan nan ba.