Faransa ta doke Albania 2 da 0

Faransa ta samu tsallakewa zuwa zagaye na biyu a gasar cin kofin Turai da ake gudanarwa a kasar bayan ta doke Albania ci 2 da 0 a daren jiya Laraba.

Faransa ta tsallake zagaye na biyu a gasar cin kofin Turai Reuters

Ana dab da kammala wasan ne Antoine Griezmann da Dimitri Payet suka kwaci Faransa a hannun Albania.

Wasannin Euro 2016

Yanzu Faransa ce saman teburin rukuninsu na A da maki shida Switzerland kuma da za ta hadu da Faransa a wasan rukuninsu na karshe ita ce ke matsayi na biyu da maki 4 bayan ta yi kunnen doki ci 1 da 1 da Romania.

Romania na iya sha idan har ta ci Albania kwallaye da yawa amma sai Faransa ta doke Switzerland.

A rukunin B kuma a yau Wales za ta kara da Ingila wasan da zai ja hankali a yau tsakanin kasashen biyu na Birttaniya.

Ingila dai za ta nemi doke Wales domin tsira a gasar bayan ta yi kunnen doki da Rasha a karawar farko.

Wales ce saman teburin rukuninsu na B kuma nasara akan Ingila zai tabbatar wa kasar nasarar tsallakewa zuwa zagaye na biyu.

Jamus za ta kara da Tsohuwar abokiyar gabarta Poland a yau Alhamis inda Robert Lewandowski zai hadu da abokan wasan shi na Bayern Munich

Ukraine kuma za ta fafata ne da Nothern Ireland.