Gobarar dajin California ta kone fadin kasar da ya zarce girman Los Angeles

Gobarar dajin da masana suka yiwa lakabi da Dixie na ci gaba da yin karfi a arewacin California da ke Amurka, abin da ya sa wutar zama ta biyu mafi muni a tarihin jihar.

Yadda gobarar dajin da masana suka yiwa lakabi da Dixie ta kone garin Greenville da ke jihar California. 4 ga watan Agusta, 2021. JOSH EDELSON AFP

Zuwa safiyar ranar Lahadi gobarar dajin ta kone fadin kasar da ya kai kadada dubu 463 da 477 fiye da kadada dubu 447 da 723 da ta kone tun a ranar Asabar.

Kawo yanzu fadin kasar wutar dajin ta lakume ya zarce girman birnin Los Angeles.

Wasu jami'an kwana-kwana yayin kokarin kashe gobarar dajin Dixie a jihar California da ke kasar Amurka. JOSH EDELSON AFP

Jami’an kwana-kwana fiye da dubu 5 ke kokarin kashe gobarar dajin ta Dixie, da ta yi sanadin bacewar mutane akalla 5.

Masana dai sun yi hasashen cewa wutar da ta tashi tun a ranar 13 ga watan Yuli, za ta iya zarce ranar 20 ga watan Agustan nan kafin kawo karshenta.