'Yan sandan Faransa na shan suka kan azabtar da masu zanga-zanga

'Yan Sandan Faransa na fuskantar matukar suka kan yadda faifan bidiyo ya nuna jami’an su na fesa hayaki mai yaji kan masu fafutukar kare muhalli da ke zaman dirshan wajen wata gada a birnin Paris.

Wasu 'yan sandan Faransa lokacin da su ke dakile masu zanga-zanga a birnin Paris REUTERS/Philippe Wojazer

Ministan cikin gida Christophe Castaner ya bukaci gudanar da bincike kan lamarin da ya auku ranar juma’a lokacin da masu zanga zangar ke nuna rashin gamsuwar su da manufofin gwamnati.

Hotunan bidiyon da aka nada wanda aka yada ta kafar intanet da kuma tashoshin talabijin sun haifar da mumunar suka kan jami’an Yan Sandan.