Hukumomin Chadi sun karbi tubabbun mayakan boko haram 46

Rundunar Hadin kai ta kasashen Najeriya da Nijar da Kamaru da kuma Chadi dake yaki da mayakan boko haram MNJTF ta sanar da mika tubabbun mayakan 46 ga hukumomin Chadi. 

Sojojin hadakar da ke karkashin rundunar hadin gwiwa ta MNJTF daga Najeriya da Nijar da kuma Kamaru sun samu nasarar kashe mayakan ISWAP fiye da 100. © MNJTF

Sanarwar da kakakin rundunar Laftanar Kanar Abubakar Abdullahi ya rabawa manema labarai tace kwamandan sashe na 2 na rundunar ta MNJTF, wato Manjo Janar Djouma Youssouf Mahamat Itno ne ya shugabanci mika wadannan tubabbun mayaka 46 ga jami’an gwamnatin Chadin a karshen wannan mako. 

Wasu daga yan Boko Haram da aka mikawa kasar Chadi © MNJTF

Kanar Abdullahi yace an yi bikin mika su ne a Bagasoli, kuma ya samu halartar ministan kula da ayyukan jama’a Abdoulaye Mbodou Mbami wanda ya karbe su a madadin gwamnati. 

Wannan na daga cikin fadada ayyukan da rundunar ke yi tare da gwamnatin Chadi na ganin an baiwa mayakan kwarin gwuiwar aje makaman su domin rungumar zaman lafiya. 

Yayin da yake tsokaci a wajen bikin, Janar Itno ya bukaci sauran mayakan dake daji da su bi sahun wadannan 46 wajen aje makaman su, yayin da ya jinjinawa shugabannin al’umma akan rawar da suka taka na fadakar da jama’a illar daukar makamai. 

Hukumomin Chadi a lokacin karbar tubabbun mayakan Boko Haram 46 © MNJTF

Bikin ya samu halartar muhimman mutane, cikin su harda Gwamnan Yankin Lac, Janar Djibrine Ratou da Kantoman Yankin Kaya, Hassane Abderamane da kuma sarakunan gargajiya. 

Kanar Abdullahi ya bayyana bikin a matsayin wata gagarumar ci gaba a yunkurin da rundunar ke yin a kawar da ayyukan ta’addanci a yankin.