Maganar rashin lafiyata shirme ne kawai - Tinubu

Dan takarar shugabancin Najeriiya karkashin jam’iyyar APC mai mulki, Bola Ahmed Tinubu ya bayyana zancen rashin lafiyarsa da aka yi ta yayatawa a matsayin tsohon labari da kuma shirme.

Bola Ahmed Tinubu © daily trust

Tinubu ya fadi haka ne a zantawar da ya yi da kafar Freedom Radio a yayin gudanar da ibadar Umara a Saudiya, yana mai cewa, yanzun nan ya kammala sassarfa tsakanin dutsinan Safa da Marwa har sau bakwai, wanda mutun mara koshin lafiya ba zai iya ba a cewarsa.

Masu sukar Tinubu dai na ci gaba da cewa, ba zai iya jagorancin Najeriya ba saboda dalilai na rashin cikakkiyar lafiya.

Sai dai a cewar dan takarar na APC,  yanzu yanzu ya kammala gudanar da aikin Umara tare da kewaye dakin Ka’aba sau bakwai da kuma kai-kawo tsakanin Safa da Marwa, yayin da ya diga ayar tambaya kan ko mara lafiya zai iya irin wannan aikin?

Wannan na zuwa ne a daidai lokacin da ya rage ‘yan makwanni a gudanar da babban zaben shugabancin Najeriya, inda Tinubu zai fafata da manyan ‘yan takara irinsu Atiku Abubakar da Rabi’u Musa Kwankwaso da kuma Peter Obi da dai sauransu.