Sojin Najeriya sun kashe mayakan ISWAP 103 yayin sumame a arewa maso gabas
Rundunar Sojin Najeriya ta Operationa Hadin Kai ta sanar da kashe ‘yan ta’addan kungiyar Boko Haram da na ISWAP wadanda yawansu ya kai 103 yayin sumamen da ta shafe makwanni 3 ta na yi kan batagarin a yankin arewa masi gabashin kasar.
Wallafawa ranar:
Daraktan sashen yada labarai na Ma’aikatar tsaron Najeriyar Musa Danmadami da ke bayyana hakan jiya alhamis a Abuja ya ce dakarun sun kuma yi nasarar kame ‘yan ta’adda 22 ciki har da kwamandoji 4 baya ga wasu mutane 18 da ke taimakawa ‘yan ta’adda.
Janar Musa Danmadami ya kuma bayyana yadda dakarun Sojin suka kubutar da fararen hula 30 da ke tsare a hannun ‘yan ta’addan yayin Iyalan ‘yan ta’addan 280 da suka kunshi maza 29 da mata 73 da kuma kananan yara 148 suka mika wuya.
Kakakin na ma’aikatar tsaron Najeriya ya tabbatar da yadda Sojojin sama da na kasa suka yiwa maboyar ‘yan ta’addan luguden wuta wanda ya kai ga wannan nasara.
A cewarsa ‘yan ta’addan na ISWAP da Boko Haram na boye ne a kananun kauyuka da kuma kan duwatsun da ke yankin na Arewa maso gabas.
Ma’aikatar tsaron Najeriyar ta bayyana cewa a tsawon makwanni 3 da dakarun na ta suka kaddamar da sumame kan maboyar ‘yan ta’addan sun yi nasarar kwato bindigogi kirar AK47 guda 20 kana kirar G3 guda 2 sai kirar FN 5 da kuma QJC 2 sai babbar motar daukar bindiga mai silke sai harsasai dubu 2 da 411 sai kuma wasu harsasai mai alamar NATO kana gurneti 36 da sauran makamai masu hadari.
Sauran abubuwan da dakarun suka kwato daga maboyar ‘yan ta’addan sun kunshi Babura 33 da kekuna 33 sai kayakin kula da lafiya da kuma tarin kayakin sawa dana abinci sai tsabar kudi Naira dubu 291da 60.
LabaranSamun Labaran RFI, Hirarraki, Rubattattuun Labarai, Labarai game da wani, shirye-shirye.
Hulda da mu