2face ya bukaci a gudanar da zanga zanga a Najeriya

Fitaccen mawakin Najeriya 2face Idibia ya yi kira ga masoyan shi su fito zanga-zanga a ranar Talatar makon gobe domin adawa da matsin tattalin arziki da ake fama da shi a Najeriya.

Mawaki 2face Idibia

Zalika mawakin ya bukaci gwamnatin kasar da ta dauki matakan magance matsalar.

2face ya yi kiran ne a wani sakon bidiyo da ya wallafa a shafin shi na facebook, wanda kuma cikin sa’a guda, sama da mutane dubu ashirin da biyu suka kalli sakon.

Kafofin sadarwa na intanet dai sun kasance hanyoyin kiran gangamin zanga-zanga a Afrika, to sai dai kuma abin mamaki ne mawaki ya fito ya dauki irin wannan matsayin na siyasa.

A tataunawarsa da sashin hausa na RFI Saifullahi Ibrahim mawakin Pop da ake kira DR Pure a Kano, ya ce ko da yake, suna goyon bayan kawo karshen matsin tattalin arziki da al’ummar Najeriya ke fuskanta, ba zanga zanga ba ce hanya mafi dacewa wajen jan hankalin gwamnati.

A cewar Dr Pure, kamata yayi mawaka su bi hanyoyin da suka dace, cikin ruwan sanyi gami da hikima, wajen bada gudunmawarsu domin samun sauki ga ‘yan Najeriya.