Boko Haram ta rasa sakewa a yanzu

Rundunar Sojin Saman Najeriya ta bayyana cewa Mayakan Boko Haram ba ta da sakewa a yanzu har su samu damar kashe mutane ko kuma karbe sansanonin Sojoji.

Dakarun Najeriya dake yaki da mayakan Boko Haram AFP PHOTO/SUNDAY AGHAEZE

Babban hafson rundunar ne, Saddique Abubakar ya fadi haka a lokacin da yake gabatar da jawabi a wani taro da aka shirya a babban birnin Abuja.

Abubakar ya kara da cewa rundunar Sojin saman ta yi matukar karya lagwan mayakan na Boko Haram a Arewa maso gabashin Kasar.

Shugaban Kasar dai Muhammadu Buhari ya yi alkawarin kawo karshen kungiyar wadda ta salwantar da rayukan al-umma da dama a Najeriya da kasashen dake da makwabtaka da ita da suka hada da Nijar da Kamaru da Chadi.