Gawar Sarauniya Elizabeth ta bar fadar Balmoral zuwa Edinburgh

Tafiya daga Balmoral zuwa Fadar Holyroodhouse a Edinburgh na da nisan mil 175. Akwatin gawar sarautar na tafiya ne tsakanin Aberdeen da Dundee, a gabar gabashin Scotland.

Jama'a sun yi jerin gwano a birnin Ballater na kasar Scotland, yayin da babbar motar daukar gawar Sarauniya Elizabeth ta biyu ke wucewa zuwa Edinburgh daga Balmoral na Scotland. AP - Andrew Milligan

Ayarin motocin rakiyar sun ketare garin Angus na Forfar inda suka wuce fadar Glamis Castle, gidan kakannin mahaifiyar marigayiya Sarauniya kuma wurin da aka ce ta gudanar da rayuwar yarinta

A nan ne iyayenta suka gudanar da hutun aure, kuma mahaifiyarta, Sarauniya Elizabeth, ta haifi 'yar uwarta Gimbiya Margaret a 1930.

Akwatin gawar Sarauniyar zai wuce ta Edinburgh a yau  zuwa Fadar Holyroodhouse.

A halin da ake ciki a Ingila, mutane na ci gaba da tururuwa zuwa fadar Windsor da fadar Buckingham domin shimfida furanni da ke nuna alhinin tafiyar Sarauniyar.

Ana bukukuwan shelanta sabon sarki a fadin Birtaniya

Yayin da aka dauko gawar sarauniya daga Balmoral zuwa Holyroodhouse, ana gudanar da bukukuwa na musamman da kuma fareti a Wales, Scotland da Ireland ta Arewa domin shelar Sarki Charles III.

Yanzu haka dai an karanta sanarwar nadin sabon sarki a Cardiff, Edinburgh da Belfast.

Bayan haka, za a harba bindigogi 21 a wajen fadar Edinburgh, fadar Cardiff da kuma fadar Hillsborough a Belfast.

Dubban mutane ne suka taru a dukkannin wurare ukun, domin shaida yadda ake bikin hawan sabon sarkin Birtaniya.