Bukatun Rasha na barazanar kawo cikas ga tattaunawar nukiliyar Iran

Bukatun da Rasha da gabatar kan rikicinta da Ukraine, a cikin mintunan karshe na tattaunawar ta da wasu manyan kasashen duniya, sun yi barazanar kawo cikas ga shirin farfado da yarjejeniyar nukiliyar Iran a ranar Juma'a, abinda ya sanya kungiyar EU sanar da dakatar da tattaunawar.

Babban jami’in da ke kula da manufofin kasashen ketare na kungiyar tarayyar Turai EU Josep Borrell. REUTERS - POOL

Babban jami’in da ke kula da manufofin kasashen ketare na kungiyar tarayyar Turai EU Josep Borrell ya wallafa a shafinsa na twitter cewa an dakatar da tattaunawa kan yarjejeniyar nukiliyar ta Iran ce, saboda wasu dalilai da suka bijiro ba tare da karin bayani ba.

A karshen watan Nuwamba aka fara tattaunawar da ake yi a Vienna babban birnin kasar Austria tsakanin kasashen Birtaniya da China da Faransa da Jamus da Iran da kuma Rasha inda Amurka ta tura wakilci.

A makon da ya gabata Rasha ta ce tana neman a ba ta tabbacin cewa takunkumin da kasashen yamma suka kakaba wa tattalin arzikinta bayan mamayewar da ta yi wa Ukraine ba zai shafi kasuwancinta da Iran ba.