Libya ta cimma matsayar tsagaita wuta da 'yan tawaye

Shugaban gwamnatin rikon kwaryar Libya da ke samun goyon bayan Majalisar Dinkin Duniya, Fayez al-Sarraj da kuma janar Khalifa Haftar wanda ke rike da muhimman yankunan kasar, sun cimma yarjejeniyar tsagaita wuta, tare da soma shirye-shiryen gudanar da zabubuka a kasar nan ba da jimawa ba.

Shugaban Faransa Emmanuel Macron tare da Firaministan Libya Fayez al-Sarraj a hannun hagu da kuma Khalifa Haftar a hannun dama REUTERS

Taron wanda mutanen biyu suka gudanar a birnin Paris karkashin jagorancin shugaban Fransa Emmanuel Macron, ya kasance na farko da daya daga cikin manyan kasashen duniya ta dauki nauyin shiryawa a baya-baya nan.

A cewar Macron, za a iya gudanar da zabuba a kasar ta Libya kafin karshen shekara ta 2018, to sai dai kafin nan, dole ne a tabbatar da cewa an tsagaita wuta a tsakanin bangarorin da ke dauke da makamai a sassan kasar a cewarsa.

Sanarwar da mutanen biyu suka sanyan hannu ta kunshi batutuwa guda 10, da suka hada da tsagaita wutar, sai kuma tabbatar da cewa an hana yaduwar makamai a cikin Libya, wanda shi ne sharadin farko don share fagen gudanar da zabuka.

Libya dai na fama da yakin basasa ne tun a shekara ta 2011, bayan da ‘yan tawaye tare da samun goyon bayan manyan kasashen duniya suka kashe shugaban kasar Kanar Mu’ammar Gadhafi.