Mun kori kungiyar IS daga Iraqi- al-Abadi

Firaministan Iraqi, Haider al-Abadi ya ce an kawo karshen yakin da kasar ke yi da kungiyar jihadi ta IS, tare da ikirarin cewa dakarun kasar sun samu galaba a kan kungiyar.

Mayakin kungiyar IS rike da tuta a birnin Mosul a 2014. REUTERS/Stringer/Files

A wani taro a Baghdad, babban birnin kasar, al-Abadi ya ce dakarun kasar a yanzu haka su ne ke cikakken iko da iyakar kasar da Syria, saboda haka yaki ya kare.

Ya bayyana hadin kai da sadaukarwa a matsayin sirrin nasarar da kasar ta samu a kan kungiyar ta IS.

A shekara ta 2014 ne IS ta karbe iko da yankuna masu yawa a arewaci da kuma yammacin Baghdad bayan wani hari da mayakan suka kai.