Majalisar Korea ta Kudu ta tsige shugabar kasar Park Geun-Hye

‘Yan majalisun kasar Korea ta Kudu, sun gabatar da kudurin tsige shugabar kasar Park Geun-Hye, sakamakon zarginta da aikata almundahana, da kuma cin hanci da rashawa.

Shugabar Korea ta Kudu Park Geun-Hye

Wannan zargi dai ya kawo tsaiko ga gwamnatin Park, wanda kuma yasa dubban mutanen kasar gudanar da zanga-zanga, don neman shugabar kasar ta sauka daga mukaminta.

‘Yan majalisu 234 ne suka kada kuri’ar tsige shugabar kasar, yayinda 56 suka ki amincewa.

A halin yanzu, baki dayan ikon Park Geun-Hye ya koma ga Firaministan kasar ta Korea, Hwang Kyo-ahn, har sai kotun fasalta kundin tsarin mulkin kasar ta yanke hukuncin tabbatar da tsigewar da 'yan majalisun kasar suka yi ko akasin haka.