Amurka tace Mali na biyan Wagner Dala miliyan 10 kowane wata

Kasar Amurka tayi zargin cewar gwamnatin sojin Mali na biyan kamfanin sojojin haya Rasha da ake kira Wagner Dala miliyan 10 kowanne wata domin gudanar da aikin tsaro a kasar.

Wasu daga cikin dakarun kamfanin sojojin haya na Wagner a Jamhuriyar © Franceinfo

Kwamandan sojin Amurka dake kula da nahiyar Afirka, Janar Stephen Townsend ya bayyana haka, inda yake cewa sojojin hayar na kamfanin Wagner na goyawa sojin Mali baya da sunan yaki da ‘Yan ta’adda a cikin kasar.Janar Townsend ya bayyana zaman kamfanin Wagner a cikin Mali a matsayin abin takaici wanda ba zai iya samarwa kasar da tsaron da take bukata ba.

Dakarun sojin haya na Wagner a garin Segou na kasar Mali © Observateur civil anonyme

Kwamandan yace suna da yakinin cewar kamfanin na karbar Dala miliyan 10 daga gwamnatin kasar kowanne wata, kuma ya na zaton za’a ayi amfani da ma’adinan kasar da suka hada da zinare ne wajen biyan su.

Dakarun Barkhane a Mali AP - MOULAYE SAYAH

Kasar Mali ta fada cikin tashin hankali tun daga shekarar 2012 inda ayyukan ‘Yan bindiga suka jefa kasar cikin mummunar yanayi, abinda ya yadu zuwa kasashen Nijar da Burkina Faso.