Nkurunziza ya jaddada aniyarsa ta yin tazarce a Burundi

Shugaban Kasar Burundi Pierre Nkurunziza ya shaidawa al’ummar kasar cewar zai tsaya takarar shugabancin kasar a zaben da za a yi a watan gobe, a dai dai lokacin kasashen duniya ke gargadin ya kaucewa matakin. Tuni shugabannin kasashen da ke Gabacin Afirka suka kira taron gaggawa a makon gobe don tattaunawa kan matsalar wadda tuni ta haifar da ‘yan gudun hijira sama da 40,000 da suka bar kasar zuwa Rwanda.

Masu zanga-zangar adawa da kudirin tazarcen shugaban Burundi Nkurunziza AFP PHOTO / PHIL MOORE

Majalisar Dinkin Duniya tace mutanen kasar Burundi sama da 21,000 suka tsere zuwa kasar Rwanda tsakanin Assabar zuwa Lahadi saboda fargabar rikicin siyasa a cikin kasar.

Tun a farkon watan Afrilu ne Jam’iyyar CNDD mai mulki ta ba shugaban kasa Pierre Nkurunziza damar neman wa’adi na uku a zaben shugaban kasa da za a gudanar a ranar 26 ga watan Yuni.

Tun a 2005 ne shugaban ke jagorantar kasar, yayin da ‘yan adawa ke bayyana cewa matakin tazarcen ya sabawa kundin tsarin mulki.