Dubban mutane na tserewa daga Jamhuriyar Afrika ta Tsakiya

Dubban mutane ne suka tsere daga yankunan da sabon rikici ya barke tsakanin tsoffin ‘yan tawaye da mayakan sa kai a Jamhuriyar Afrika ta Tsakiya, lamarin da ya sa ake fargabar barkewar rikicin addini a kasar. 

'Yan tawayen kungiyar Seleka suna sintiri a kan titin birnin Bangui REUTERS/Alain Amontchi

Kasar ta shiga rudani tun bayan da mayakan na Seleke suka karbe ikon babban birnin Bangui suka kuma jingine gwamnatin Francois Bozize a watan Maris.

Shugaban ‘yan tawayen Michel Djotodia ya nada kansa a matsayin shugaban rikon kwaryar kasar tare da rushe hadakar kungiyoyin ‘yan tawaye da suka gaza wajen kare rikici tskanin mayakan sa kai.

Sabon rikicin ya barke ne a kudancin garin Bouca kilomita 290 daga arewacin birnin Bangui.