Babu wata barazanar tsaro da za ta yi tasiri yayin wasanni - Rasha

Rasha ta sanar da daukar matakan murkushe duk wata barazanar tsaro da aka iya tasowa yayin gudanar da gasar cin kofin duniya da za ta karbi bakunci.

Shugaban hukumar samar da tsaro yayin gasar cin kofin duniya a Rasha, Alexei Lavrishchev. AFP / Yuri KADOBNOV

A karshen watan Mayu, ma’ikatar tsaron kasar ta sanar da girke wasu na’urori a filayen da za a buga wasannin gasar cin kofin duniyar, irin wadanda da aka yi amfani da su a yake-yaken kasashen Syria da Ukraine, don bada kariya ga filayen wasannin daga yiwuwar kai hare-haren ta’addanci.

Sai dai har yanzu ma’aikatar cikin gidan kasar ta Rasha, bata bayyana adadin jami’an tsaron da za a girke domin sintiri yayin gudanar gasar ta cin kofin duniya.

Akalla mutane 600, 000 daga kasashen duniya ake sa ran zasu halarci kallon gasar cin kofin duniyar da za a soma ta a mako mai kamawa.