Buffon ya yi bankwana da Juventus

Mai tsaron raga na Juventus Gianluigi Buffon ya samu kyautuka da karramawar magoya bayan kungiyar, bayan da ya kawo karshen wasa a cikinta a fafatawar da suka yi da Verona.

Mai tsaron raga na Juventus Gianluigi Buffon yayin fita daga wasan karshe da ya bugawa kungiyar. Massimo Pinca/Reuters

Yayin wasan da Juventus ta lallasa Verona da 2-1, an canza Buffon a mintuna na 63, domin bashi damar ganawa da magoya bayansa, wadanda suka karrama shi ta hanyar mikewa tsaye baki daya.

A shekarar 2001 Buffon ya sauya sheka daga kungiyar Parma zuwa Juventus akan fam miliyan 32, wanda a waccan lokacin ya kafa tarihin zama mai tsaron raga mafi tsada a duniya.

Tuni dai kungiyar Paris St-Germain ta yi wa Buffon tayin buga mata wasa, yayinda a Juventus ta yi masa tayin mukamin zama daga cikin mataimakan masu horarwa.