Arsenal ta gaza darewa teburin Premier

Kungiyar kwallon kafa ta Arsenal ta barar da damarta ta hayewa saman teburin gasar Premier ta Ingila sakamakon kashin da ta sha ci 2-1 a hannun Everton a wasan da suka yi jiya.

Kocin Arsenal Arsene Wenger Reuters/Matthew Childs

Arsenal ce ta fara zura kwallo a ragar Everton ta hannun Alexis Sanchez a minti na 20 da saka wasa, amma daga bisani Seamus Coleman ya farke wa Everton a minti na 44.

Sai kuma Ashley Williams da ya jefa kwallon karshe a minti na 86 ana dab da tashi wasan.

Yanzu haka dai Chelsea ce ke ci gaba da jan ragama a teburin gasar da maki 37, in da ta bai wa Arsenal tazarar maki uku.

Ita kuwa Everton na matsayi na bakwai da maki 23, yayin da a karo na farko kenan da ta samu nasara tun watan Octoban da ya wuce.