Mun murkushe mayakan Boko Haram a yankin Tafkin Chadi - Buratai

Babban Hafsan sojin Najeriya Laftanar Janar Tukur Buratai, ya yi shelar samun nasarar murkushe mayakan kungiyar Boko Haram a yankin tafkin Chadi da kuma arewacin jihar Borno.

Babban Hafsan Sojin Najeriya Lafatanar Janar Yusuf Tukur Buratai. AFP PHOTO/STRINGER

Buratai ya ce, a halin yanzu sojojin Najeriya sun mayar da hankali ne kan tabbatar da tsaron da suka samar a yankunan da suka kwace daga hannun mayakan.

Babban hafsan sojin Najeriyar, ya bayyana haka ne, a lokacin da ya kai wa bataliya ta 8 ziyara a garin Munguno, inda ya ce ana gaf da karasa kawar da dukkanin barazanar mayakan na Boko Haram, duk da hare-haren da suka hada dana kunar bakin wake, da suke ci gaba da kai wa a yankunan arewa maso gabashin Najeriya.

Lafatanar Kanal Buratai ya kuma yabawa rundunar sojin saman Najeriya dangane da irin gudunmawar da suka bayar wajen samun nasarar yakin.