Rangers ta zama kungiya mafi gazawa a tarihin gasar zakarun Turai

Zakarar gasar kwallon kafar Scotland, Rangers FC ta zama kungiyar da ta fi kowacce rashin tabuka abin kirki a tarihin gasar zakarun Turai, sakamakon gazawarta a wasannin rukuni na gasar da aka kammala jiya talata.

Tawagar kwallon kafar Rangers. AFP

Wannan tarihi mai muni da Rangers ta kafa, ya biyo bayan nasarar da Ajax ta samu kanta da kwallaye 3-1, a wasan karshe na matakin rukunin da suka kara jiya Talata a gasar Zakarun Turai.

Sakamakon ya nuna kenan Rangers ba ta samu maki ko da guda ba rukuninta na A, bayan buga wasanni 6, yayin da aka jefa mata kwallaye 20 a raga.

Rangers, wadanda suka kai wasan karshe a gasar cin kofin Europa a kakar wasan da ta gabata, kwallo daya kacal suka samu jefawa a ragar abokan hamayya cikin wasanni 6 a gasar zakarun Turai ta bana.

Wannan rashin karsashi ya sanya Rangers zama kungiya mafi rashin kokari a matakin rukuni na gasar ta Zakarun Turai, tun lokacin da aka sake fasalin gasar  a shekarar 1992.

A baya, kungiyar Dinamo Zagreb ta kasar Croatia ce ta ke rike wannan tarihin, bayan da ta kare a mataki na karshe a rukuninsu ba tare da maki ba, yayin da kuma aka jefa mata kwallaye 19 a raga, a kakar wasa ta  2011/12.

Ita ma Viktoria Plzen ta yi daidai da tarihin Dinamo Zagreb a ranar Talata da yamma yayin da ta kare a mataki na karshe a rukuni na uku ba tare da maki ba, tare da karbar bakuncin kwallaye 19 a ragar ta.