Manchester City da Liverpool za su hadu a wasan gab da karshe na FA

Kungiyar kwallon kafa ta Liverpool za ta hadu da Manchester City a wasan gab da na karshe na cin kofin FA bayan nasararta ta lallasa Nottingham Forest a jiya lahadi da kwallo 1 mai ban haushi.

Haduwar Liverpool da Manchester City a ko da yaushe na kasancewa babban wasa. POOL/AFP

Itama dai Manchester City ta yi nasara ne kan Southampton da kwallaye 4 da 1 wanda ya ba ta damar kai wa matakin wasan na gab da karshe.

A bangare guda Crystal Palace da ta yi nasara kan Everton da kwallaye 4 da nema za ta hadu da Chelsea wadda a asabar din da ta gabata ta lallasa Middlesbrough da kwallaye 2 da nema.

Liverpool wadda ta lashe kofin Carabao a wannan kaka na harin kofin na FA ne karo na 4 yayin da Manchester City jagorar firimiya ke harin kofin karo na 3.

Wasannin na gab da karshe dukkaninsu za su gudana ne a filin wasa na Wembley da ke London tsakanin ranakun 16 zuwa 17 ga watan Aprilu, wato kwanaki kalilan bayan Manchester City ta karbi bakoncin Liverpool a firimiyar ingila, kungiyoyin da suka juye zuwa manyan abokanan dabi a yanzu.

Kungiyoyin biyu da yanzu haka ke da tazarar maki 1 tal a tsakaninsu matsayin jagora da mai bi mata a teburin firimiya na tseren lashe kofuna 3 ne wannan kaka da suka kunshi na firimiyar da na zakarun Turai da kuma FA wanda kuma dukkaninsu za su iya bayar da mamaki.