An bukaci a daure Eto'o na shekaru 10

Masu gabatar da karar a Spain sun bukaci a daure tsohon dan wasan Barcelona Samuel Eto’o dan kasar Kamaru, shekaru 10 a gidan yari, da kuma biyan tarar kudin da ya kai Dala miliyan 19.

Dan wasan Kamaru Samuel Eto'o REUTERS/Andres Stapff

Bukatar hukunta Eto’o ya biyo bayan zargin da ake masa da kafa wasu kamfanomin domin kaucewa biyan haraji tsawon lokacin da ya dauka yana taka leda a kungiyar ta La Liga.

Tuhumar da ake yiwa dan wasan ta fi mayar da hankali kan kamfanin da ya kafa a shekarar 2006, yana aikata Coge, tare da boye kudadden da yawansu ya kai euro miliyan 4 na haraji.

Eto’o da ke wasa a kungiyar Antalyaspor da ke Turkiya a cewar masu shigar da karar ya zama dole ya fuskanci shari’ar.

Zargin da ake wa Eto’o na zuwa ne, yayin da a yanzu haka Lionel Messi da Neymar fitattun ‘yan wasan Barcelona ke fuskantar irin wannan tuhuma kan batun da ya shafi haraji.