Buhari ya wanke kan sa a tuhumar Saraki

Shugaban Najeriya Muhammadu Buhari ya nesanta kan sa daga zargin da ake masa na hannu wajen tuhumar da ake yiwa shugaban Majalisar Dattawan kasar Bukola Saraki a gaban kotu.

Shugaban Majalisar Dattawan Najeriya Bukola Saraki ynaija.com

Wata sanarwar da mai Magana da yawun shugaban Garba Shehu ya fitar na cewa Buhari ba shi da hannu cikin shari’ar, kuma a matsayin sa na wanda ya yi rantsuwar kare kundin tsarin mulkin kasa babu yadda zai sa baki kan harkokin shari’a.

Magoya bayan shugaban Majalisar na zargin cewa da hannun gwamnati a tuhumar da ake yiwa saraki yanzu haka.

A na zargin Saraki da aikata laifuka 13 dangane da bada bayanan karya kan kadarorin da ya mallaka.

A ranar jumma’ar da ta gabata ne Kotun ladabtar da ma’aikata a Najeriya ta ba da sammacin kama shi bayan ya ki halartar kotun domin fuskantar shari’a.