Bakin-haure 50 dake kwadago a Qatar ne suka mutu a 2020

‘Yan cirani da ke aikin kwadago hamsin ne suka mutu a Qatar a bara sannan sama da 500 sun samu munanan raunuka, a daidai lokacin da kasar ke shirin karbar bakuncin gasar cin kofin duniya ta shekarar 2022.

Rahoton na zuwa ne a yyin da ake caccakar yanayin da ma'aikata baki ke aiki a Qatar. © Kai Pfaffenbach / Reuters

Rahoton da kungiyar kwadago ta duniya ta fitar, ya zo ne a daidai lokacin da ake sukar yanayin aiki ga dubun dubatar ma'aikata bakin haure, ciki har da wadanda suka gina filayen wasa don gasar cin kofin duniya.

Rahoton , ya ce babban abin da ya fi haifar da hakan shine faduwa daga saman gini, ko kuma zubewar gini ko kuma wani abu na daban a kan su. Kuma galibi wadanda abin ya fi shafa sun fito ne daga kasashen, Bangladesh, India da Nepal.

Qatar, wadda ta yi jerin sauye sauye a bangaren kwadagonta, da suka hada da bullo da tsarin mafi karancin albashi na dala 275 duk wata da kuma saukaka hanyar canjin wajen aiki tun da aka zabe ta a matsayin wadda za ta dau nauyin gasar cin kofin duniya ta 2022, ta yi na’am da rahoton, inda ta ce tana matukar daraja dangantakarta da kungiyar kwadago ta duniya ILO.