Kyrgystan ta samu sabon Firaminista

Majalisar Dokokin Kyrgystan ta zabi Sadyr Japarov a matsayin sabon Faranminista, bayan da shugaban gwamntin kasar Koubatbek Boronov ya yi murabus biyo bayan zanga-zangar adawa da sakamkon zabe.

Sadyr Japarov akipress

Majalisar wadda ta sanar da zaben sabon Franministan ta ce matakin ya samo asali ne yayin taron gaggawa na musamman da ta yi a wannan Talatar bayan murabus din shugaban gwamnati Koubatbek Boronov, mai samun goyan bayan shugaban kasa mai ci.

A cewar sashin labarai na majalisar, an gudanar da taron gaggawar da ya kai ga zaben sabon Franministan Sadyr Japarov ne, a wani otel saboda masu zanga-zanga sun ci gaba da mamaye majalisar dokokin kasar.

Rahotanni sun ce, mutumin da aka zaba a matsayin sabon shugaban gwamnati na daya daga cikin fursunoni da masu zanga-zangar adawa da sakamakon zabe suka kubutar lokacin da suka kwace gine-gine gwamnati, cikin su har da tsohon shugaban kasa Almazbek Atambayev.

Tuni Hukumar zaben Kyrgystan ta sanar da soke zaben ‘yan Majalisun da aka yi a karshen mako saboda zanga zangar adawa da sakamakon sa wanda ke neman jefa kasar cikin tashin hankali.

Yayin da jiga-jigan 'yan adawar kasar cikinsu har da tsohon Firaminista da suka soki sakamakon zaben inda suka sanar da kafa kungiyar da za ta tabbatar da zaman lafiya a cikin kasar.

A halin da ake ciki rahotanni sun tabbatar da cewar, shi kansa shugaban kasar Kyrgyzstan da ke cikin rudani ya bayyana cewa a shirye ya ke ya sauka domin mika mulki ga wani jigon siyasa da bai bayyana kowane ne shi ba.