EU ta bukaci gaggauta tsagaita wuta a Syria

Kungiyar kasashen Turai EU, ta ce ya zama dole gwamnatin Syria da kawayenta su kawo karshen barin wutar da suke yi kan ‘yan tawaye, da wasu kungiyoyin ‘yan ta’adda a lardin Idlib, abinda yayi sanadin halakar fararen hula da dama, da kuma tagayyara wasu dubbai.

Wasu yankuna da sojin Syria suka yiwa luguden wuta a yankin Idlib. Delil SOULEIMAN / AFP

Ministan harkokin waje na kungiyar Tarayyar Turan Josep Borrell da ke wannan kira ya kuma dora alhakin hasarar rayukan daruruwan fararen hula a lardin kan gwamnatin Syria da Rasha.

A farkon watan Disambar nan kawancen dakarun Syria da Rasha suka kaddamar da sabon farmaki kan lardin na Idlib a arewacin kasar ta Syria, dake zama tungar karshe ta ‘yan tawayen kasar, duk da yarjejeniyar tsagaita wutar da aka cimma tsakanin bangarorin a watan Agustan da ya gabata.

Wata kiddidiga da majalisar dinkin duniya ta fitar a baya bayan nan ta nuna cewar, a tsakanin 12 ga Disambar da muke zuwa 25 ga watan, luguden wutar dakarun na Syria da Rasha kan ‘yan tawaye, ya tilastawa fararen hula sama da dubu 2 da 35 tserewa daga muhallansu.

Wannan tasa a jiya lahadi kungiyar kasashen Turai ta bukaci kaiwa ‘yan gudun hijira akalla miliyan uku da har yanzu ke lardin na Idlib agajin gaggawa.