Adadin mutanen da ambaliyar ruwa ta kashe a Sudan ya kai 134

Ambaliyar ruwa a kasar Sudan ta kashe akalla mutane 20 a cikin makon da ya gabata, kamar yadda hukumomin kasar suka sanar, lamarin da ya kara adadin wadanda suka mutu sakamakon ambaliyar ruwa tun da aka fara damina a watan Mayu zuwa 134.

Wata mata da ke kwashe kayan ta sakamakon ambaliya da ta rutsa da su AP - Fareed Khan

Ofishin Birgediya Janar Abdul-Jalil Abdul-Rahim, shugaban kwamitin tsaron fararen hula na kasar Sudan, ya ce karin mutane 120 sun jikkata sakamakon ambaliyar ruwa da ta afku a makon da ya gabata.

Ruwan sama kamar da bakin kwarya a cikin watan Agusta da farkon watan Satumba, ya shafe hanyoyi, gidaje, da muhimman ababen more rayuwa a fadin kasar, tare da katse hanyoyin samar da kayayyaki ga yankunan karkara dake bukatar agajin jin kai.

Bisa rahoton da Majalisar Dinkin Duniya ta fitar na baya-bayan nan da aka yi, ambaliyar ruwan ta shafi kimanin mutane 286,400, kana gidaje 16,900 suka lalace.

Hukumar ta ce a bana, mutane 74 ne suka nutse a ruwa, 32 kuma suka mutu a lokacin da gidajensu suka rufta, sai kuma wasu shida da suka mutu sakamakon wutar lantarki.

Kauyuka gabashi da yammacin kasar ne suka fi fama da mamakon ruwan sama a bana.

A ranar Laraba, kafar yada labaran kasar Sudan, SUNA, ta bayar da rahoton cewa, wata sabuwar masana'antar sukari da aka gina a kusa da birnin Kassala da ke gabashin kasar ta rushe sakamakon ruwan sama kamar da bakin kwarya.

A shekarar 2020, ambaliyar ruwa da ruwan sama mai karfi ya kashe mutane kusan 100 tare da lalata gidaje sama da 100,000 a kasar ta Sudan.