Mali ta ce sojojinta ba su yi kisan kiyashi a yankin tsakiyar kasar ba

Gwamnatin Mali ta musanta zargin da ake yi wa sojojinta na yi wa fararen hula da dama kisan gilla a yankin tsakiyar kasar a farkon watan Maris.

Sojojin Mali yayin atsaye a yankin Mopti dake tsakiyar Kamaru. AP - Francois Rihouay

Sanarwar ta biyo bayan matakin da rundunar wanzar da zaman lafiya ta Majalisar Dinkin Duniya ta yanke a ranar Juma'ar da ta gabata, na gudanar da bincike kan kisan da aka yi wa mutane da dama a kauyukan da ake yankin Diabaly.

Wani faifan bidiyo da ke yawo a shafukan sada zumunta a wannan makon, ya nuna gawarwakin mutane da dama da aka kone su, bayan rufe musu idanu tare da daure hannayensu wuri guda. Wasu daga cikinsu kuma an ga ramuka a bayan kawunansu.

Wani jami'i a a yankin na tsakiyar kasar Mali, wanda ya nemi a sakaya sunansa, ya ce an gano gawarwakin ne a daren ranar Talatar da ta gabata, kuma ana kyautata zaton sune wadanda sojojin Mali suka kama wasu a ranar 20 ga watan Fabrairu, wasu kuma a ranar 1 ga watan Maris.

Sai dai, gwamnati kasar ta yi fatali da zargin, tare da bayyana shi a matsayin karya tsagwaronta.

Majalisar Dinkin Duniya dai ta sha zargin sojojin Mali da kashe fararen hula da kuma wadanda ake zargin mayakan sa kai ne a tsawon shekaru goma da suka shafe suna yaki da kungiyoyin da ke da alaka da Al Qaeda da kuma IS.