Tsohon shugaban Guinea na cikin koshin lafiya - ECOWAS

Wakilan kungiyar kasashen yammacin Afirka ta ECOWAS sun ce, hambararren shugaban kasar Guinea Alpha Conde na cikin koshin lafiya.

Tsohon shugaban kasar Guinea Alpha Conde. AFP/File

Wakilan tawagar ta ECOWAS sun bada tabbacin ne  yayin ziyarar da suka fara a kasar jiya Juma’a don ganawa da sojojin da suka yi juyin mulki a karkashin Lafatanar Kanal Mamady Dambouya.

A makon da ya kare ne dai kungiyar kasashen na yammacin Afirka ta dakatar da Guinea daga cikinta, yayin da kuma a Juma’ar nan, kungiyar kasashen Afirka AU ta bi sahu.

Shugaban Hukumar Gudanarwar ECOWAS Jean-Claude Kassi Brou, wanda ke cikin tawagar da ta sauka a birnin Conakry, ya ce masu shiga tsakani sun gana da tsohon shugaba Conde kuma yana samun kulawa mai kyau.

Juyin mulkin da aka yi a Guinea dai shi ne na 4 cikin watanni 13 a Yammaci da kuma Tsakiyar Afirka, abin da ya tayar da hankalin masu sa ido kan yadda gwamnatocin da sojoji ke jagoranta ke karuwa a yankunan.