'Yan bindiga sun sace 'yan China, Mauritania a Mali

‘Ya bindiga sun sace wasu ‘yan kasar China 3 da ‘yan Mauritania 2 a wani wajen gini dake kudu maso yammacin Mali, kamar yadda rundunar sojin kasar ta sanar.

Duk da ayyukan dakarun Barkhane a yankin Sahel, matsalar tsaro ta ci gaba da ta'azzara. © Franck Alexandre/RFI

Maharani sun isa wajen ginin ne mai nisan kilomita 55 daga garin Kwala a jiya Asabar, suka kuma yi awon gaba da motocin akori-kura 5 da kuma mutanen da suka yi garkuwa da su.

‘Yan bindigar sun kuma lalata kayan aikin gine gine na wani kamfanin kasar China, a cewar wata sanarwa daga rundunar sojin kasar.

Kamfanin dillancin labarai na kasar Mauritania, Al-Akhbar ya ruwaito cewa ‘yan bindigar sun kai harin ne bisa babura, suka kuma yi kone konen kayan aikin kamfanin kafin daga bisani su yi awon gaba da mutanen.