Faransa ta bayyana goyon baya ga sabon shugaban Chadi

A jiya Juma’a Chadi ta gudanar da jana’izar Idriss Deby Itno, jigo a yaki da ‘yan ta’addan yankin Sahel,  a yayin Faransa ta bayyana goyon baya ga dansa, wanda ya gaje shi, Mahamat Idriss Deby.

Mahamat Idriss Deby Itno, lsabon shugaban Chadi. © Tele Tchad via AP

Marigayi Idriss Deby,  wanda ya shafe shekaru 30 yana mulkin kasa ya rasu ne sakamakon raunukan da ya samu a wani gumurzu tsakanin sojojin gwamnati na ‘yan tawaye, kamar yadda sojin kasar suka sanar a ranar Talata.

Mutuwarsa ta girgiza abokansa na yankin Sahel da Faransa wacce ta yi musu mulkin mallaka, wadanda suka kwashe shekaru 9 su na yaki da ta’addancin da ya mamaye kasashe 3.

Rikicin ya lakume dubban rayuka, kana ya raba dubun dubata da muhallansu.