'Yan Afrika ta Kudu sama da dubu 1 sun kamu da coronavirus cikin sa'o'i 24

Hukumomin lafiya a Afrika ta Kudu sun ce mutane dubu 1 da 160 sun kamu da cutar coronavirus a rana guda, adadi mafi girma da kasar ta gani tun bayan bullar annobar cikinta a watan Maris.

Daya daga cikin likitoci a Afrika ta Kudu yayin gwajin cutar coronavirus a Jeppestown dake birnin Johannesburg. 14/5/2020. AFP

A ranar asabar da ta gabata mutane 263 suka kamu da cutar a Afrika ta Kudu, abinda ke nuna cewar zuwa ranar lahadi adadin ya ninkasama da sau 4.

Ma’aikatar lafiyar kasar tace a halin yanzu jumillar yawan wadanda suka kamu da cutar coronavirus a kasar ya kai dubu 15 da 515, daga cikin kuma 264 sun mutu.

Afrika ta Kudu ta fi kowace kasa yawan masu cutar coronavirus a nahiyar Afrika, biye da ita Masar ce mai mutane dubu 11 da 719 da suka kamu, daga cikinsu kuma 612 sun mutu.