Tarin jama'a sun jikkata a arangama tsakanin bangarorin adawar Congo

Wasu Majiyoyi a Jamhuriyar Dimokiradiyar Congo sun ce akalla mutum guda ya mutu, yayin da wasu sama da 80 suka samu raunuka, sakamakon arangamar da aka yi tsakanin magoya bayan jam’iyyun daban daban a zabe mai zuwa.

Rahotanni sun ce tsamin alaka na kara tsananta tsakanin magoya bayan na jam'iyyun adawa tun bayan karatowar zaben wanda ake sa ran ya sauya fasalin mulkin kasar. © REUTERS

Rahotanni sun ce rikicin ya barke ne a Tshikapa da ke Yankin Kasai, lokacin da jiragen manyan 'yan siyasa biyu, Felix Tshesekedi da ministan ilimi Maker Mwangu suka sauka.

A baya-bayan nan ana yawan samun barkewar rikici musamman tsakanin bangarorin adawa a kasar ta Jamhuriyar Demokradiyyar Congo wanda a lokuta da dama kan kai ga asarar rayuka, yayinda a bangare guda hare-haren 'yan bindiga ke kara ta'azzara.

Kasar Congo na shirin gudanar da zaben shugaban kasa a karshen wannan mako, wanda ake saran ganin an zabi wanda zai maye gurbin shugaba Joseph Kabila da ya kwashe shekaru 17 a karagar mulki.