Amurka, Faransa da Ingila sun kaddamar da hari Syria

Shugaban Amurka Donald Trump da kansa ne ya bayar da umurni a cikin daren juma'a na soma kai farmaki a Syria, tare da hadin gwiwar kasashen Faransa da Ingila, matakin da Rasha ta danganta da rashin mutunta shugaba Vladmir Putin.

Farmakin kasashen Amurka,Faransa da Ingila a Syria Handout / STR / SYRIAN GOVERNMENT'S CENTRAL MILITARY MEDIA / AFP

A jiya juma'a ne kasar Sweden ta yada rubutacciyar matsayar da aka cimma a zauren Majalisar dinkin Duniya a kan batun aika wakilan hukumar Majalisar dinkin Duniya a Siriya don kawo karshen batun makami mai guba ga baki daya.

Bukatar aika wakilan majalisar dinkin Duniyar ta taso ne a wani taron kwamitin tsaro na majalisar dunkin Duniya.

A cikin sirri dai ne aka gudanar da taron tattaunawar kan barazanar daukar matakin Soji a kan Syria domin koya mata hankali kan zargin da ake mata na amfani da makami mai guba a yankin birnin Dhouma da ke hannun yan tawaye.

Duk da gargadin wakilan Majalisar dinkin Duniya Amurka ,Faransa da Ingila sunyi gaban kansu,lamarin da jakadan Rasha a Majalisar dinkin Duniya ya bayyana damuwa a kai tareda sanar da cewa kasar sa Rasha zata dau matakan da suka dace cikin dan karamin lokaci.