Amurka ta yaba da matakin Saudiya kan yaki da IS

Ma’aikatar tsaron Amurka ta yi marhaba da alwashin da Saudiya ta yi na yakar kungiyar IS ta kasa a Syria.

Sakataren tsaron Amurka, Ash Carter REUTERS/Yuri Gripas/Files

Amurka ta dauki tsawon makwanni ta na kiran kawayanta daga kasashe 65 da ta ke jagoranta a yaki da IS a Syria da Iraqi, da su kara kaimi wajen bayar da gudun mawa, yayin da a cikin watan jiya sakataren tsaron Amurkan, Ashton Carter ya caccaki kasashen da ba su tabaka komai ba.

Mr Cater zai gana da hukumomin tsaron Saudiya a makon gobe a birnin Brussels na Belgium, inda ake sa ran tattaunawa kan tsare-tsaren kawar da kungiyar IS.