Shugabannin duniya sun aike da sakonnin sabuwar shekara

Shugabannin kasashen duniya sun aike da sakonni daban–daban zuwa ga al’ummominsu dangane da shiga wannan shekara ta 2016.

Taron shugabannin duniya Reuters/路透社

Ta’addancin da kuma kawarar bakin haure, su ne muhimman batutuwan da shugabannin kasashen Turai suka fi mayar da hankali a jawaban nasu na bana.

Duk da barazanar kai harin ta’addanci da aka yi fargaba a birnin Munich lokacin bukukuwan sabuwar shekarar, Shugabar gwamnatin Jamus Angela Merkel ta jaddada matsayinta na bai wa bakin haure damar shiga kasar a cikin wannan shekara.

Batun alakar da ke tsakanin Birtaniya da Kungiyar Turai, shi ne abinda ya fi jan hankali a jawabin firaminista David Cameron, yayin da shi kuma Francois Hollande na Faransa ke cewa shekara ta 2016 za ta kasance ta aiki wurjanjan domin yaki da ‘yan ta’adda a ciki da wajen kasar.

Su ma shugabannin Afirka sun aike da sakonni zuwa ga al’ummominsu, inda shugaban Chadi Idris Deby ya yi kira ga kasashen duniya da su taimaka a fadan da ake yi da Boko Haram, kamar dai yadda shugaban Najeriya Muhammadu Buhari ya kuduri aniyar yakar wannan kungiya da ta yi sanadiyyar daidaita mutane sama da milyan biyu a kasar.

A kasashen Nijar, Jamhuriyar Dimokurdiyar Congo, Gabon da Congo Brazzaville, batun zabubukan da ake shirin gudanarwa ne suka fi jan hankula a jawaban shugabannin kasashen, yayin da Shugaban Guinea Conakry Alpha Conde ya taya al’ummar kasar murnar kawar da cutar Ebola.

A Cote D’ivoire Kuwa Alassan Ouattara ne ya sanar da yin sassauci ga fursunoni dubu uku da 100 da aka yankewa hukunci saboda aikata laifufuka masu nasaba da rikicin zaben kasar.