Quds: Akwai yiwuwar barkewar tarzoma a sallar juma'ar yau

Jami’an tsaron Isra’ila na a cikin shirin ko ta kwana dangane da yiyuwar sake barkewar tarzoma a zagayen masallacin Quds a wannan juma’a, inda tunni mahukuntan kasar suka sanar da haramta wa wadanda shekarunsu ba su kai 50 ba halartar sallar juma’a a yau.

Wani bangare na farfajiyar masallacin Quds REUTERS/Muammar Awad

Rundunar ‘yan sandan Isra’ila ce ta sanar da daukar matakin haramtawa matasa halartar sallar ta yau biyo bayan mummunan artabun da aka yi a maracen jiya lokacin da falasdinawan ke murna dangane da janye sabbin matakan tsaro a zagayen masallacin.

Sanarwar ta ce mata da kuma wadanda shekarunsu suka haura 50 a duniya kawai ne za a bai wa damar shiga masallacin na Haram Sharif wanda yahudawan ke kira Temple Mount a yau, yayin da aka jibge wasu jami’an tsaro a kan hanyoyin da ke isar da jama’a zuwa ga masallacin da ke cikin tsohon birnin Quds.

A jiya alhamis ne Isra’ila ta sanar da janye dukkanin sabbin matakan tsaro da suka hada da cire kemarorin daukar hoto da kuma na’urorin shinshinan karafa da ta kafa a cikin masallacin, wannan kuwa sakamakon tarzomar da aka share tsawon kwanaki 13 ana gudanarwar tare da samun asarar rayuka.

Daruruwan mutane ne suka fito domin yin zanga-zangar murna dangane da wannan makati, lamarin da ya rikide zuwa tarzoma a yammacin jiya, kuma kawo yanzu rahotanni na cewa an cafke akalla falasdinawa 130 daga marecen jiya zuwa safiyar yau juma’a.