An rataye dan bindigar Mumbai a Indiya

Hukumomin kasar Indiya sun rataye Mohammed Ajmal Amir Kasab, daya daga cikin ‘Yan bindigar da suka kai hari a Mumbai a shekarar 2008, wanda ya yi sanadiyar hallaka mutane 166. A yau Laraba ne aka rataye Kasab a gidan yarin Yerwada a Pune da ke yankin yammacin Jahar Maharashtra bayan shugaba Pranab Mukherjee ya yi watsi da koken Dan bindigar na neman Afuwa.

Mohammed Ajmal Amir Kasab a lokacin da ya ke hannun 'Yan Sandan India Reuters

Kasab ne kadai cikin ‘Yan bindigan da ya tsira da ransa, kuma kotu t ayi watsi da daukaka karar da ya yi a farkon watan nan, abinda ya sa aka kai shi gidan yarin Mumbai.

A shekarar 2010 ne aka yanke wa Kasab hukuncin Daurin rai da rai bayan kama shi da laifukan yaki da suka hada da kisa da ta’addanci.