An cafke dan Alqa'ida da ya tsere daga kurkukun Mauritania

Mahukuntan Mauritnia sun sanar da cafke Cheikh Ould Saleck, dan kungiyar Al Qaeda wanda ya tsere daga gidan yarin makonni uku da suka gabata daidai lokacin da yake jiran a zartas masa da hukuncin kisan da aka yanke masa.

Mohamed Ould Abdel Aziz, shugaban Mauratania AFP PHOTO / WATT ABELJELIL

Wata majiyar ‘Yan sanda a kasar ta shaida wa kamfanin dillacin labaran Faransa AFP cewa an cafke dan Al-qaedan ne lokacin da yake kokarin shiga kasar Guinea Bissau.

Ana zargin Saleck da hannu wajen kai hari akan shugaban Mauritania Mohamed Ould Abdoul Aziz inda a lokacin aka samu asarar jami’an tsaron kasar da kuma wasu daga cikin maharani.