Afrika ta kudu za ta shigar da tan miliyan 5 na masara

Rahotanni daga kasar Afirka ta kudu sun ce kasar za ta shigar da tan miliyan 5 na masara domin cike gibin karancin abincin da ake fama da shi a kasar sakamakon matsalar farin da aka samu a kakar bana.

Fari ya janyo wa Afrika ta Kudu asarar tan miliyan 10 na masara Reuters

Jannie de Villiers, shugaban hukumar samar da abinci a kasar ya danganta matsalar farin da aka samu da sauyin yanayi wanda ya sa aka yi asarar kusan ton miliyan 10 na masara da ake nomawa a kasar.

Jami’in ya ce kasar na cikin mawuyacin hali a yanzu haka.

Ko a watan jiya sai da hukumar samar da abinci ta Majalisar Dinkin Duniya ta sanar da matsalar abinci a daukacin kasashen da ke kudancin Afirka.