Sai watan Satumba Buhari zai nada Ministoci

Jaridar Washington Post ta jiyo shugaban Najeriya Muhammadu Buhari da ke ziyara a Amurka na cewa ba zai nada ministoci ba sai zuwa watan Satumba mai zuwa. Shugaba Buhari ya ce idan har ya nada ministocin a cikin watan satumba, ba ya nufin cewa an makara domin hakan ta faru da Obama.

Shugaban Amurka Barack Obama na ganawa da Muhammadu Buhari na Najeriya REUTERS/Kevin Lamarque

Shugaban ya bayar da misali da shugaban Amurka Obama, a wa’adin mulkinsa na farko inda sai da ya share tsawon watanni ba tare da ya nada wasu daga cikin mukamai a majalisarsa ta ministoci ba.

Buhari ya ce kawai bukatar a gina tubalin shugabanci nagari domin kaucewa kura-kuran da gwamnatocin baya suka fuskanta.

A cikin sakonsa na Sallah ga 'Yan Najeriya, shugaba Buhari ya bukaci 'Yan Najeriya su sa hakuri domin yana aiki tukuru domin tabbatar da canjin da da suka zaba.

00:59

Hon Faruk Adamu Aliyu

A ziyararsa a Amurka, Buhari ya  ce rashin gina tabbatar da shugabanci nagari tun da farko shi ke sa shugabanni na samun matsala a Najeriya.

Shugaban na Najeriya ya jaddada matsayinsa na kawo karshen cin hanci da rashawa a Najeriya tare da inganta tattalin arzikin kasar.

Sannan Buhari ya nemi taimakon shugaban Amurka Barack Obama na kwato wa Najeriya kudadenta dala biliyan 150 da aka sace aka ajiye a kasashen waje.