Jega: INEC ta shirya ma zaben Osun

Hukumar Zabe a Najeriya tace ta shirya tsaf domin gudanar da zaben Jihar Osun da za’a yi a karshen wannan mako. Shugaban hukumar Farfesa Attahiru Jega yace hukumar ta kuma kwashe lokaci mai tsawo tana cire sunayen mutanen da suka yi rajista fiye da daya a fadin kasar.

Shugaban Hukumar Zabe a Najeriya Farfesa Attahiru Jega RFI/Bashir

A ranar Assabar ne 9 ga watan Agusta za’a gudanar da zaben gwamna a Jihar Osun inda Gwamnan Jihar mai ci Rauf Aregbesola na Jam’iyyar adawa ta APC ke neman wa’adi na biyu, kuma zai fafata ne da Dan takarar Jam’iyyar PDP mai mulki a Tarayya Iyiola Omisore.

‘Yan takara daga Jam’iyyu siyasa 20 ne zasu fafata a zaben na neman kujerar gwamna a Osun.

Jega yace hukumar zabe ta shirya domin gudanar da zaben Osun wanda suke fatar zai fi na Ekiti tsabta bayan sun inganta rijistar masu kada kuri’a.